Ajoni Aru Anyanya Galpa by Nani Saharia Bora অযোনি আৰু অন্যান্য গল্প, অনুবাদ : ননী চহৰীয়া বৰা Purbayon Publication

ইতিমধ্যে কেইবাখনো জনপ্ৰিয় গ্ৰন্থ অনুবাদেৰে অনুবাদক হিচাপে অসমীয়া সাহিত্য জগতত সমাদৰ লাভ কৰা ননী চহৰীয়া বৰাৰ নৱতম গ্ৰন্থ ‘অযোনি আৰু অন্যান্য গল্প’; য’ত সন্নিৱিষ্ট হৈছে এলানি দেশী-বিদেশী বিশ্ব বিখ্যাত অনূদিত গল্প।
সংকলনটিত আছে বিশ্ব সাহিত্যৰ বছা বছা তেৰজন গল্পকাৰৰ তেৰটা ভিন্নসুৰী গল্প। বিশ্বপ্ৰসিদ্ধ সাহিত্যিক এলবাৰ্ট কেম্যু গী দ্য মোপাছাঁ, এণ্টন চেখভ, ভল্গা, ইভান বুনিন, লুই পিৰানডেল’, ইন্দ্ৰকান্তি জানকীবালা, সুবোধ ঘোষ, ৰাস্কিন বণ্ড, মৰিচ মেটাৰলিংক, নাট হেমছন, সুভাষ চন্দ্ৰ দত্ত আৰু নীলিমা সেন গংগোপাধ্যায়ৰ বাছকবনীয়া সৃষ্টি ‘অযোনি আৰু অন্যান্য গল্প’সমূহে ভিন্ন দেশ আৰু ভাষাৰ গল্প হিচাপে কাহিনী, পটভূমি, প্ৰেক্ষাপট, শৈলী, দৰ্শন আদি সকলো দিশৰে পৰা স্বাভাৱিকতে বহন কৰিছে ভিন্নতা‌ আৰু বৈচিত্ৰ্য। যিয়ে সংকলনটিত অন্তৰ্ভুক্ত প্ৰতিটো গল্পকে বিবিধতা প্ৰদান কৰি ভিন্নস্বাদৰ কৰি তুলিছে।
কোনোটো গল্প যদি এবচাৰ্ড দৰ্শনৰ ওপৰত প্ৰতিষ্ঠিত; কোনোটো আকৌ যাদুকৰী মনোবিশ্লেষণেৰে পৰিপুষ্ট। লগতে সামাজিক চেতনা, মানৱীয় প্ৰমূল্যবোধ, জীৱনৰ ক্ষণভংগুৰতা অথবা জীৱনৰ বিচিত্ৰ উপলব্ধিৰে পৰিপূৰ্ণ গল্পকেইটিয়ে সাহিত্যৰ বিশ্বজনীনতাক সুন্দৰভাৱে বহন কৰিছে।
পৰিশীলিত আৰু বাহুল্যবৰ্জিত ভাষাৰে সৈতে ‘অযোনি আৰু অন্যান্য গল্প’ নিশ্চিতভাৱে এক মসৃণ আৰু সাৱলীল অনুবাদ। গ্ৰন্থখনে পাঠকক একেটা থূপতে বিশ্বসাহিত্যৰ কেইবাটিও মনোৰম গল্প-পঠনৰ অপূৰ্ব সোৱাদ যোগাব।
অযোনি আৰু অন্যান্য গল্প
ননী চহৰীয়া বৰা
পূৰ্বায়ণ প্ৰকাশন
দাম ১৯০ টকা