Bookmark – Dr. Ratnottama Das Bicrom বুকমাৰ্ক – ড॰ ৰত্নোত্তমা দাস বিক্ৰম – PURBAYON

ঔপন্যাসিক, গৱেষক, অনুবাদক আৰু দিল্লী বিশ্ববিদ্যালয়ৰ আধুনিক ভাৰতীয় ভাষা আৰু সাহিত্য অধ্যয়ন বিভাগৰ অধ্যাপক ৰত্নোত্তম দাস বিক্ৰমৰ বুকমাৰ্ক এখন ব্যতিক্ৰমী আৰু সমানে গুৰুত্বপূৰ্ণ গ্ৰন্থ৷ সমসাময়িক সময়ৰ বিশ্বসাহিত্যৰ ভালেমান গুৰুত্বপূৰ্ণ লেখকৰ বাছকবনীয়া কিছুসংখ্যক সৃষ্টিক তেওঁ এই গ্ৰন্থৰ পাতত ঠাই দিছে৷ তেওঁৰ বিস্তৃত পঠন অভিজ্ঞতাৰ গভীৰ সুঁতিটোৰ প্ৰবাহ প্ৰতিটো লেখাত প্ৰতিভাত৷ চাৰিটা ভাগত ভগাই তেওঁ লেখাসমূহ এই গ্ৰন্থত সন্নিৱিষ্ট কৰিছে৷ প্ৰথম ভাগত সাম্প্ৰতিক বিশ্বসাহিত্য ঃ বিদেশী আৰn এছীয়মূলীয় লেখকৰ সৃষ্টিৰ স্বাদ, দ্বিতীয় ভাগত ভাৰতীয় সাহিত্যৰ পঠন, তৃতীয় ভাগত অসমীয়া সাহিত্য ঃ আপোন ভাষাটোৰ সাহিত্যৰ পুনৰ্পঠন আৰু চতুৰ্থ ভাগত শিশু আৰু কিশোৰ সাহিত্যৰ আলোচনা অন্তৰ্ভুক্ত হৈছে৷ আটাইতকৈ মন কৰিবলগীয়া কথাটো এয়ে যে প্ৰচুৰ সৃজনীশীল লেখিকাগৰাকীৰ এই লেখাবোৰ নিৰস সাহিত্য আলোচনা নহয় বৰং ইয়াৰ পঠনযোগ্যতা আৰু গভীৰতা দুয়োটাই চমকপ্ৰদ৷ বিশ্বসাহিত্যৰ অতিসাম্প্ৰতিক ধাৰাৰ লগতে অসমীয়া সাহিত্যৰ গৰিমাময় সাহিত্য পৰম্পৰাক একেডাল সূতাৰে বান্ধি থোৱা এই গ্ৰন্থখন সাহিত্যৰসিকৰ বাবে আগ্ৰহৰ বিষয় হৈ উঠাটো অৱধাৰিত৷